Fréttir af haustþingi Þórbergsseturs um Fell í Suðursveit
Málþing Þórbergssetur sem haldið var í lok október var afar áhugavert. Þar var fjallað um endlok byggðar á höfuðbýlinu Felli í Suðursveit sem stóð undir Fellsfjalli á austanverðum Breiðamerkursandi, landsvæði sem nú tilheyrir Vatnajökulsþjóðgarði. Jafnframt var rætt um framgang og síðar hop Breiðamerkurjökuls , landmótun og hvað það var sem varð ,,Felli að falli", eins og Snævarr Guðmundsson fjallaði um í erindi sínu. Mikill áhugi er nú hjá heimamönnum að gera einnig skil fornri menningar- og búsetusögu innan þjóðgarðsins og vonir standa til að fjármunir fáist í slíkt verkefni á næstu árum. Því miður var mikið um að vera þessa helgi og frekar fáir sóttu málþingið og ekki tókst heldur að fá neinn til að senda viðburðinn út í beinu streymi vegna anna. Umfjöllunin var þó afar gagnleg fyrir þá sem koma að rannsóknarstörfum og uppbyggingu innan þjóðgarðsins, þar sem þarna kom fram mikil þverfagleg þekking á svæðinu þar sem fræðimenn og heimamenn er gerst þekkja til fjölluðu um sögu, búsetu og staðhætti í samhengi við gríðarlegar breytingar á náttúrufari og landslagi allt frá tímum litlu ísaldar til okkar daga. Starfsmenn Vatnajökulsþjóðgarðs voru mættir og auk þess starfsfólk á vegum hinna ýmsu stofnana sem koma að rannsóknum á svæðinu auk áhugafólks um sögu og fornar minjar til að fræðast um staðinn. Dagskráin var löng og stóð til klukkan 5 síðdegis með góðu matar og kaffihléi.
Haustþing Þórbergsseturs verður haldið laugardaginn 29. október og hefst klukkan 11:00. Fjallað verður um forna frægð jarðarinnar Fells í Suðursveit, landmótun, jöklabreytingar og lífsstríð ábúenda uns byggð lagðist þar af vegna ágangs jökuls og jökuláa á seinni hluta 19.aldar. Einnig reifaðar hugmyndir að samstarfsverkefni um sjóngervingu menningar- og náttúruarfs með tilliti til nýjustu tækni í formi merkinga innan þjóðgarðsins og e.t.v. sýndarveruleika.
Tónleikar á Ólafsvöku í Kálfafellsstaðarkirkju 29. júlí 2022 voru fjölsóttir þetta árið enda heimsfrægt tónlistarfólk mætt á staðinn. Það voru þau Eyþór Gunnarsson og Ellen Kristjánsdóttir, systurnar Sigga og Beta og bróðir þeirra Eyþór, en þau systkinin höfðu gert garðinn frægan í Eurovisionkeppni vorsins 2022. Kálfafellsstaðarkirkja er einstaklega hentug til tónleikahalds og samstarf við kirkjuna um þennan einstæða atburð ár hvert ánægjulegt. Um leið er rifjuð upp sagan um dýrlinginn Ólaf helga en kirkjan var helguð honum í kaþólskum sið. Líkneski af Ólafi helga var gefið í kirkjuna laust eftir aldamótin 1700 til að hrinda fornum álögum sem völva lagði á staðinn í frumkristni. Því miður rigndi hressilega þetta árið svo ekki var hægt að heimsækja leiði völvunnar undir Hellaklettum en viðburðurinn hefur einnig þann tilgang að halda á lífi fornum sögum og vitneskju um þær minjar í landslagi sem enn eru greinilegar og tengjast þessum forna ákvæði um örlög völvunnar á Kálfafellsstað.
Það var fámennt en góðmennt á bókakynningu skáldsins Garibalda í Þórbergssetri á miðju sumri. Garibaldi las þar úr bók sinni ,,Drauminn dvelur" . Boðið var upp á kaffiveitingar að sveitasvið á eftir og spjallað saman. Garðar dvaldi þessa viku á Sléttaleiti sem að er hús í eigu Rithöfundasambands Íslands. Nágrannar Þórbergsseturs í skáldastétt sem búa á Sléttaleiti tímabundið koma því oft við í Þórbergssetri. Segja má að umhverfi Sléttaleitis sé kyngimagnað og hefur án efa haft áhrif á einhverja höfunda sem þar hafa dvalið við ritstörf undanfarin ár. 
Einn sólardag í sumar komu hjónin Þorvaldur Gylfason og Anna Karitas Bjarnadóttir færandi hendi í Þórbergssetur. Var mikill asi á þeim, en þau sögðust hafa í farteskinu mynd sem tengdamóðir Önnu gaf henni. Tengdamóðir hennar var Guðrún Vilmundardóttir, dóttir Vilmundar Jónssonar landlæknis sem bjó lengi á Ísafirði eða allt til ársins 1931.. Hann var Skaftfellingur í móðurætt og mikill vinur Þórbergs Þórðarsonar. Þórbergur heimsótti hann oft og dvaldi langdvölum hjá fjölskyldu hans vestur á Ísafirði. Myndin hefur verið tekin á einhverjum af ferðalögum þeirra fyrir vestan og þá sennilega fyrir 1930, en ekki er vitað nákvæmlega um tildrög þeirrar ferðar. Myndin hefur án efa verið afskaplega nýstárleg á þeim tíma, þrír flottir stælgæjar saman á ferðalagi á nýmóðins fararskjóta. Þórbergur er lengst til vinstri á myndinni, Vilmundur í miðjunni en ekki er vitað hver þessi einkennisklæddi bílstjóri er. Myndin verður innrömmuð og sett inn á sýninguna í Þórbergssetri við fyrsta tækifæri. Þórbergssetur þakkar þeim hjónum gjöfina og þann góða hug sem henni fylgir og hressilega heimsókn í Þórbergssetur sumarið 2022.
Þann 19. maí var haldin kynning í Nýheimum á verkefni sem Gísli Sverrir Árnason vinnur að á vegum Þórbergsseturs og einkaaðila um ævi og störf hjónanna frá Dilksnesi, Eymundar Jónssonar og Halldóru Stefánsdóttur. Nokkrir ættingjar og áhugafólk voru mætt og einnig var fyrirlesturinn sendur út um allan heim til að kynna fyrir afkomendum þeirra hjóna hvar verkefnið er statt og hvernig vinnu við það hefur verið háttað. Saga þeirra Eymundar og Halldóru er jafnframt saga Skaftfellinga á 19. öld sem spannar vítt svið allt frá kotbúskap fátæks fólks í örbirgð og erfiðleikum til þess tíma þegar fólk fór að leita betra lífs og hafði von um tryggari lífsafkomu. Saga þeirra hjóna blandast sögu Skaftfellinga er fóru til Vesturheims og varpar um leið ljósi á hvernig vaknaði framfarahugur meðal þjóðarinnar í byrjun 20. aldarinnar og ýmsar tækniframfarir leiddu til betra mannlífs og bættra samgangna. 
Fjölmennt Bridgemót var haldið í Þórbergssetri helgina 30.apríl - 1. maí. Það var mikil kátína og gleði að hittast aftur eftir tveggja ára covid hlé en spilaður var tvímenningur á 16 borðum alls. Margir nýir spilarar mættu og höfðu á orði að þeir myndu koma aftur að ári. Mótið hófst reyndar á föstudagskvöldið, þá var svokallað bjórmót, upphitun fyrir aðal spilamennskuna. Tvímenningskeppnin hófst svo kl 2 á laugardeginum og spilað var linnulaust fram eftir kvöldi. Tekið var þó hlé og etið spikfeitt hrossakjöt með öllu tilheyrandi við mikla ánægju veislugesta. Alltaf er besta kjötið í hverri hrossakjötsveislunni eftir aðra en þetta mun hafa verið 14. mótið sem haldið hefur verið. Síðan var spilað á sunnudeginum frá kl 10 - 15 en þá lágu úrslitin fyrir. Vinningshafar voru Eðvarð Hallgrímsson og Bjarni Guðmundsson og náðu þeir 57,3 % nýtingu í keppninni. Í öðru sæti voru Bernódus Kristinsson og Ingvaldur Gústafsson og í þriðja sæti Jón Halldór Guðmundsson og Einar H.Guðmundsson.Meðfylgjandi eru öll úrslit frá mótinu. Bridgemótið er haldið í minningu Torfa Steinþórssonar á Hala (1915 - 2001) . Uppáhaldsmatur hans var saltað og feitt hrossakjöt. Torfi var mikill veiðimaður og veiddi silung í Breiðabólsstaðarlóni öll sumur fram yfir áttrætt. Það átti því líka vel við að hafa stórt bleikjuhlaðborð í hádeginu á hátíðisdaginn 1. maí og fóru því vonandi allir saddir og sælir heim eftir að njóta samveru í einstakri veðurblíðu í sveit sólar, - Suðursveit.
Bókmenntahátíð í Þórbergssetri var vel sótt og einkar skemmtileg samverustund. Hátíðin var í beinni útsendingu og er nú að finna á