Eins og fjallað hefur verið um hér á síðunni áður var haldin bókmenntahátið á Þórbergssetri þann 11. mars en 130 ár eru liðin frá fæðingu Þórbergs. Þann sama dag og steininn úr klettunum gerðist sjálfstæður einstaklingur og tillti sér á veginn fyrir neðan Sléttaleiti. Þessi atburður setti hátíðina í stærra samhengi og dulmagnaðra. Á hátíðinni las Ragnheiður Steindórsdóttir einmitt kafla úr Steinarnir tala þar sem Bergur litli veltir fyrir sér náttúru steinanna sem hann taldi vera mest lifandi af öllum „dauðum hlutum“. Hér má nú hlýða á þennan frábæra upplestur Upplestur Ragnheiðar.

Heiðurshjónin Jakob Yngvason og Guðrún Kvaran færðu Þórbergssetri veglega gjöf í heimsókn sinni þann 17. júli síðastliðinn.

Gjöf þessi samanstendur af munum úr eigu móðurafa Jakobs Yngvasonar, skáldsins, málfræðingsins og kennarans Jakobs Jóhannessonar Smára. Auk þess færði Guðrún safninu grein sína Söfnun Þórbergs Þórðarsonar úr mæltu máli sem birtist í tímaritinu Íslenskt mál og almenn málfræði árið 2006.

Munirnir úr eigu Jakobs Jóhannessonar Smára eru annars vegar handrit að ljóðabók eftir Þórberg sem ber þann forvitnilega titil Heilir skósólar og hins vegar ljóð Þórbergs sem hann sendi vini sínum á póstkortum í tilefni jóla og áramóta.

Hinir árlegu Ólafsmessutónleikar verða  í Kálfafellsstaðarkirkju sunnudagskvöldið 29. júlí næstkomandi.  

Ólafur helgi Noregskonungur féll í bardaga á Stiklastöðum í Noregi 29. júlí 1030 og er  Ólafsmessa á sumri helguð þessum atburði. Samverustundin er helguð gömlum sögnum tengdum Ólafi en hann var verndardýrlingur kirkjunnar á Kálfafellsstað. Að lokinni helgistund verður rifjuð upp gömul þjóðsaga um völvuna á Kálfafellsstað sem var systir Ólafs helga og lesin saga um líkneski af honum sem gefið var til kirkjunnar upp úr aldamótunum 1700 til að  hnekkja álögum völvunnar á staðnum.  Líkneski þetta er varðveitt í Þjóðminjasafninu.

Lesin er frásaga Kristjáns Eldjárns af líkneskinu, að lestri loknum hefjast tónleikarnir og standa í um klukkustund. Á eftir er farið í heimsókn að Völvuleiðinu við Hellakletta og Fjölnir Torfason á Hala segir frá gömlum sögum er tengjast staðnum. Einnig sýnir hann áþreifanlega muni frá Kálfafellsstað sem varðveist hafa og sanna mátt völvunnar og áhrif hennar á lífið í Suðursveit allt fram á okkar daga.

„Kannski er það sona með steininn í skriðunni. Það gæti alveg eins verið. Ég hef aldrei fundið ból eftir hann, og þó er ég áreiðanlega búinn að glápa eftir því hundrað sinnum. O þá veit hann ennþá meira en ég hélt, því steinar, sem standa út af fyrir sig, geta séð það, sem gerist allt í kringum þá. En steinar, sem eru bundnir í klettabelti, sjá aðeins fram fyrir sig. Hann getur samt verið miljón ára gamall, fyrst milljónir ára bandingi í klettabelti, so hundruð eða eða þúsundir ára sjálfstæð vera á kettarák eða bergbrún. Er ekki allt líf sona, fyrst eitthvað í einu lagi, svo eitt sér? So aftu í einu lagi?“ (Í Suðursveit, bls. 158).

Ársskýrsla Þórbergsseturs er nú komin á vefinn.  Auk þess birtum við nú Fjárhagsáætlun 2018 og Framkvæmdaáætlun 2018.

Hin árlega hrossakjötsveisla og bridgehátíð verður haldin í Þórbergssetri 14.- 15. apríl næstkomandi. Útlit er fyrir ágæta þátttöku, en byrjað verður að spila kl 13:00 á laugardeginum og spilað svo lengi sem kraftar endast. Á sunnudeginum verður byrjað spila aftur kl.10:00 og mótinu lýkur í síðasta lagi kl 15:00. Hægt er að fá upplýsingar og skrá þátttöku í síma 893 2960 eða senda skilaboð á netfangið hali@hali .is.

Vegna fjölda fyrirspurna setjum við  inn verðskrá fyrir mótið, nægur tími er að panta máltíðir þegar komið er á staðinn.

Mótsgjald er 3000 krónur.

Gisting á Hala kostar 10.000 krónur á mann í tvær nætur, en 7000 krónur í eina nótt og morgunverður innifalinn. Einnig er hægt að panta gistingu í Skyrhúsinu sími 8998384 og á Gerði sími 4781905.

Boðið verður upp á Halahangikjöt á föstudagskvöldi fyrir svanga ferðalanga, máltíðin kostar 2000 krónur. Einnig verður boðið upp á kjötsúpu í hádeginu á laugardag fyrir 1850 kr á mann.

Hrossakjötsveisla á laugardagskveldi og Halableikja í hádegismat á sunnudeginum ásamt kaffi kostar kr 7500 per mann.

Allir eru velkomnir á meðan húsrúm leyfir.

 Fjöldi fólks sótti bókmenntahátíð í Þórbergssetri í tilefni af 130 ára afmæli Þórbergs Þórðarsonur. Segja má að undur og stórmerki hafi gerst þegar stór steinn tyllti sér upp á miðlínu vegar austan Hala snemma morguns  þennan  sama dag og vakti mikla athygli. Nær öll dagskráin fjallaði um bók Þórbergs, Steinarnir tala, svo og túlkun fræðimanna nútímans á umfjöllun Þórbergs um lifandi náttúru og talandi steina. Öll dagskráin fékk því aðra og mjög svo magnaða merkingu eftir að þessi steinn losaði sig frá þrældómi fjallsins með svo eftirtektarverðum hætti og gerðist sjálfstæður einstaklingur. Flytja á steininn í hlað á Þórbergssetri og hver veit nema hann eigi eftir að tala tungum, þó síðar verði.

http://www.ruv.is/frett/steinarnir-tala-vid-upphaf-bokmenntahatidar

Birtar verða upptökur úr dagskránni síðar á Þórbergsvefnum.  

Á hátíðinni var settur  upp minningarskjöldur um Jón Þórisson, hönnuð sýningar og byggingar Þórbergsseturs,  en hann lést í janúarmánuð 2016. Ragnheiður Steindórsdóttir eiginkona Jóns heiðraði okkur með nærveru sinni og las upp úr verkum Þórbergs, svo mikil unun var á að hlýða. Enn einu sinnu fengum við að njóta skemmtunar og listfengi Þórbergs undir lestri Ragnheiðar. Þessi stund gleymist aldrei og var enn ein sönnun þess að Þórbergur á aldrei meira erindi en nú til íslensku þjóðarinnar, þegar framundan er þjóðarátak í verndun íslenskrar tungu.