Sigurður Pálsson rithöfundur í Þórbergssetri 25. mars
Næstkomandi sunnudag, þann 25. mars verður dagskrá í Þórbergssetri á Hala í Suðursveit. Dagskráin hefst klukkan 14:00 . Gestur dagsins er Sigurður Pálsson rithöfundur og ætlar hann að fjalla um Bernskubók, sem kom út fyrir síðustu jól. Sigurður er sonur séra Páls Þorleifssonar á Skinnastað, en hann var Hornfirðingur, sonur Þorleifs Jónssonar alþingismanns á Hólum í Hornafirði. Séra Páll og Þórbergur Þórðarson voru þremenningar, Benedikt afi Þórbergs og Þórunn amma Páls voru systkini. Sigurður er því að heimsækja slóðir forfeðra sinna og frændfólks með heimsókn í Hornafjörð. Bernskubókina fjallar um æsku- og uppvaxtarár Sigurðar á prestsetrinu á Skinnastað í Öxarfirði.
Í lok dagskrár verður opnuð sýning á frumútgáfum af öllum verkum Þórbergs, sem Skinney Þinganes hefur nýlega fært Þórbergssetri að gjöf. Þar er meðal annars frumútgáfa af Bréfi til Láru frá árinu 1924, mjög fágæt og verðmæt bók, frumleg útgáfa sem aðeins kom út í 300 eintökum það ár og seldist strax upp. Önnur útgáfa kom út skömmu síðar eða árið 1925. Bréf til Láru var tímamótaverk og olli straumhvörfum í íslenskum bókmenntum.
Dagskrá í Þórbergssetri verður eftirfarandi:
14:00 Setning
14:05 Karlakórinn Jökull syngur nokkur lög
14:35 Sigurður Pálsson segir frá ritun Bernskubókar og les kafla sem tengjast Þórbergi beint og óbeint
15:15 Þórbergur og Lækningabók Jónassen; Soffía Auður Birgisdóttir bókmenntafræðingur
15:40 Bréf til Lillu Heggu, upplestur
15:50 Sýning á frumútgáfum af bókum Þórbergs, gjöf frá Skinney, Þinganes
16:10 Kaffiveitingar
Vonandi sjá Hornfirðingar sér fært að skreppa í sveitina og heiðra þannig Sigurð Pálsson rithöfund með nærveru sinni og njóta dagskrár. Það er nú árlegur viðburður í Þórbergssetri að vera með söng- og bókmenntadagskrá í marsmánuði í tilefni af afmælisdegi Þórbergs sem að er 12. mars. Allir eru velkomnir og ef fólk vill njóta sveitasælunnar í Suðursveit yfir helgina er hægt að fá gistingu á Hala og njóta náttúrunnar allt um kring. Sjá nánar á www.hali.is