Fréttapistill frá Hala

Dagbókarskrif hafa legið niðri að mestu í júlí og er það kæruleysi sannarlega ekki í anda Þórbergs. Tíðarfar hefur verið gott, frekar sólríkt og lítil rigning. Þó var þokudumbungur í nokkra daga í lok júlí. Heyskapur hefur gengið vel og er að mestu lokið en grænar plastrúllur um öll tún skreyta umhverfið og komast vonandi í stafla heim að bæ á næstu dögum. Verslunarmannahelgin var róleg hér um slóðir, unga fólkið fór á dansleik á Klaustur á laugardagskvöldið, fjölskyldufólkið með börnin var í Vík á landsmóti ungmennafélaganna og tók þátt í íþróttakeppni og skemmtunum þar og vann ýmis afrek bæði persónuleg og á landsvísu. Í dag er í raun beðið eftir rigningu til að fiskarnir hjá fyrirtækinu Jöklableikju hafi nægjanlegt vatn og geti haldið áfram að stækka. Töluverð veiði hefur verið í Breiðabólsstaðarlóni, silungur, sjóbirtingur og allmargir laxar hafa veiðst sá stærsti 7 pund. Ferðamenn hafa verið vappandi um tún og engi, margir gist á Hala og Gerði og sannarlega oft verið skemmtileg alþjóðleg stemmning á Halatorfunni. Við morgunverð í gistihúsinu á Hala hafa verið heimspekilegar umræður um alþjóðahyggju, stjórnmál, náttúruvernd og ýmsar orðræður um bókmenntir og uppbyggingu Þórbergsseturs. Setið hefur verið út á túni, morgunkaffið drukkið þar og lesið úr Sálminum um blómið um Kríulandið enda krían ekki látið sitt eftir liggja að taka á móti gestum á kvöldgöngum inn í Aur. Framkvæmdir við Þórbergssetur hafa legið niðri í sumar en fjöldi fólks hefur keyrt um hlaðið á Hala til að skima eftir Þórbergssetri í von um að búið væri að opna.Ljóst er að væntingar til verkefnisins eru miklar og margir ætla að koma við á Hala og skoða sig um þegar búið verður að opna setrið og starfsemin hefst.