Og veturinn kom aftur
Hér voru farfuglarnir farnir að vekja upp heimilisfólk á morgnana vegna fuglasöngs og atgangs í tilhugalífinu en hafa nú verið minntir óþyrmilega á að hafa sig hæga enn um sinn, því allt var orðið hvítt í morgun og býsna vetrarlegt um að litast. Það fær hinsvegar ekki stoppað framkvæmdir við Þórbergssetrið og eftir að hafa reist vegg inn í skemmunni sem skiptir henni í tvennt, klárað að klæða innveggi með gipsplötum, bollaleggingar með hæð og stærð á gluggum, er byrjað að reisa útveggi á viðbyggingu. Hún verður að mestu leyti úr gleri og því verður vítt til veggja og útsýni til allra átta. Talið er að helstu útlínur hennar verði tilbúnar fyrir næstu helgi.