Vetrarlegt í Suðursveit
Síðustu daga hefur verið vetrarveður í Suðursveit. Eins og sjá má á veðurlýsingum í dagbókinni á vefnum, snjóaði á þriðjudagskvöld og á miðvikudag var snjófjúk. Þessa viku höfum við verið að safna að okkur skemmtilegum orðum um veður og þegar litið er í dagbækur Steinþórs á Hala eða í bækur Þórbergs er ekki komið að tómum kofanum. Sem dæmi um orð sem virðast hafa verið algeng í daglegu tali má nefna, ágos, ástandur, austan frassi, það heiddi til, þykkt loft, kalsi, garri, þurrafræsingur, hjúfur er líða tók á daginn, landnyrðingur, útsynningur o.fl. Ætla má að mörg orð um veður hafi fallið úr daglegu tali fólks eftir að veðurspár og veðurlýsingar urðu staðlaðar fyrir allt landið. Hins vegar er gaman að kunna á þeim skil og þau sýna vel hversu auðug íslensk tunga er af veðurorðum og ekki síður hversu athugult fólk hefur verið þegar kom að því að lesa í veður, umhverfi og náttúrufar.